Gunnlaugur R. Jónsson Maðurinn með ljáinn saxar á kynslóðirnar og röskur þriðjungur okkar sem gengum út í vorið 1955 með stúdentspróf frá Menntaskólanum á Akureyri er horfinn af sjónarsviðinu. Nú síðast kvaddi okkur Húnvetningurinn Gunnlaugur R. Jónsson, kennari lengst af starfsævinnar, fyrst á Akranesi, síðan í Reykjavík og endaði farsælan feril sinn í Hafnarfirði þar sem hann var lengi búsettur með fjölskyldu sinni. Gunnlaugur ólst upp á Neðri-Svertingsstöðum í Miðfirði og eftir landspróf í Reykjaskóla settist hann í 3. bekk MA haustið 1951. Vorið áður útskrifaðist frá skólanum bróðir hans, Stefán Jónsson læknir. Í menntaskólanum fylgdumst við Gunnlaugur að í stærðfræðideild og með okkur tókst góður kunningsskapur. Gunnlaugur var hæglátur og dagfarsprúður, stundaði námið af alúð og hafði þess utan yndi af lestri góðra bóka. Tungumál létu honum betur en stærðfræðin og hann reyndist prýðilega ritfær. Ég átti helst von á að hann legði fyrir sig íslensku, en leiðin lá til Kaupmannahafnar 1957 þar sem hann lagði stund á dýralæknisnám um skeið áður en hann sneri sér að kennslu hér heima 1961. Tengsl hans við Danmörku héldust þó með ýmsum hætti, m.a. var hann nám í Kennaraháskólanum í Kaupmannahöfn veturinn 1976‒77 og seint á starfsævinni bætti hann við dönskukunnáttu sína í Háskóla Íslands. Hjörleifur Guttormsson
|