|
Hvers vegna þetta sprengjuregn?
Stuðningsmönnum árásarstríðsins gegn
Írak vefst tunga um tönn. Það er afar eðlilegt.
Rökin gegn þessu stríði eru yfirgnæfandi í
samanburði við það sem fært er fram því
til réttlætingar. Stríðið er hafið án
þess að umboð frá Sameinuðu þjóðunum
liggi fyrir. Alþjóðaráð lögfræðinga
hefur lýst árás á Írak sem broti gegn
stofnsáttmála Sameinuðu þjóðanna. Jónatan
Þórmundsson prófessor í alþjóðarétti
kemst að sömu niðurstöðu. Gegn þessu talar
íslenska ríkisstjórnin um leið og hún
hefur gert Ísland að þátttakanda í þessari
herför. Með því eru ráðherrarnir að
brjóta alþjóðalög og ganga gegn sáttmála
sem verið hefur helsta haldreipi smáþjóða
í meira en hálfa öld.
Einmitt Sameinuðu þjóðirnar hafa unnið að
því markvisst að knýja stjórnvöld
í Írak til að virða gerðar samþykktir
og með sýnilegum árangri. Vopnaleitarmenn óskuðu
eftir lengri tíma studdir af meirihluta ríkja í Öryggisráðinu.
Á það var ekki hlustað. Vopn Bandaríkjamanna
og Breta skyldu fá að tala hvað sem tautaði og raulaði.
Öllum má vera ljóst að eitthvað allt annað
en afvopnun Íraka og varðveisla friðar liggur að baki
því stríði sem nú er hafið. Það
skyldu þó ekki vera náttúruauðlindir þessa
hrjáða lands, olían, og þeir sem ætla að
hagnast á henni sem kalla á sprengjuregnið.
Það hefur verið afar dapurlegt að hlýða
á utanríkisráðherra Íslands á þessum
fyrsta morgni stríðs sem hann hefur gert Íslendinga
ábyrga fyrir. Þjóðin frétti um afstöðu
eigin ríkisstjórar erlendis frá. Ég minnist
þess ekki að það hafi áður gerst í
máli sem miklu varðar að íslenskir valdsmenn hafi
ekki haft döngun í sér að segja þjóðinni
hreinskilnislega frá afstöðu sem þeir hafa tekið
í hennar nafni. Í þessu tilviki var um stríð
eða frið að tefla og grundvallarafstöðu til alþjóðalaga.
Íslenska ríkisstjórnin kaus sér það
hlutskipti að kyssa á vönd Bush og ganga gegn stofnsáttmála
Sameinuðu þjóðanna. Hafði hún til þess
umboð? Hvaða nauður rak menn til slíkrar óhæfu?
Hjörleifur Guttormsson |
