NAUST kærir úrskurð en styður frekara mat

Náttúruverndarsamtök Austurlands – NAUST hafa kært til umhverfisráðherra úrskurð skipulagsstjóra ríkisins frá 10. desember 1999 um 480 þúsund tonna álver á Reyðarfirði.

Aðalkröfur samtakanna eru:

1. Að frekara mat fari fram í samræmi við úrskurð skipulagsstjóra ríkisins og taki einnig til umhverfisáhrifa allra matsskyldra framkvæmda til orkuöflunar fyrir álverksmiðjuna sem og annarra tengdra matsskyldra framkvæmda.
2. Að við frekara mat í samræmi við úrskurð skipulagsstjóra verði gerð ítarleg grein fyrir losun gróðurhúsalofttegunda frá verksmiðjunni og mótvægisaðgerðum með tilliti til alþjóðlegra skuldbindinga Íslands og þeirrar stefnu stjórnvalda að Ísland gerist aðili að Kyótó-bókuninni.

1. Að fyrirliggjandi matsferli frá 15. október 1999 verði ónýtt, þar eð frummatsskýrsla kemur ekki frá réttum aðila.
2. Að matsferlið frá 15. október 1999 verði ónýtt vegna ófullnægjandi lagastoðar fyrir matinu, eða því a.m.k. frestað þar til lög um mat á umhverfisáhrifum hafa verið endurskoðuð.

NAUST er sammála þeirri meginniðurstöðu í úrskurði skipulagsstjóra að setja beri 480 þúsund tonna álverksmiðju á Reyðarfirði í frekara mat á umhverfisáhrifum. Samtökin draga hins vegar í efa að meintur framkvæmdaaðili, Hraun ehf, sem lagði fram frummatsskýrslu uppfylli skilyrði laga. Einnig telja samtökin að grundvöllur sé brostinn undir lögum nr. 63/1993 um mat á umhverfisáhrifum vegna vanrækslu stjórnvalda að endurskoða lögin.

Með aðalkröfu sinni um heildstætt mat á öllum ráðgerðum stóriðjuframkvæmdum eystra, bæði álverksmiðju, virkjunum og raflínum, vilja Náttúruverndarsamtök Austurlands tryggja að skýr heildarmynd fáist af áhrifum þessara framkvæmda áður en ákvarðanir eru teknar og almenningi gefist kostur á athugasemdum miðað við fyrirætlanirnar í heild sinni.

Ítarleg greinargerð fylgir kærukröfunum, undirrituð af Hjörleifi Guttormssyni, sem stjórn NAUST hefur falið að gæta réttar samtakanna í tengslum við þetta kærumál. Veitir hann nánari upplýsingar um málið í síma 553 91 00 eða GSM 897 50 95.

Kæru NAUST getið þið lesið í heild hér Kæra NAUST til umhverfisráðherra 19. janúar 2000

Fréttatilkynning frá stjórn NAUST

Til baka | | Heim